X. Ricardo Losada. AVISO PREVIO: Este texto contén material que pode danar seriamente o sistema nervioso das persoas con aversión ou alerxia ás citas. É máis. Contén o tipo de citas máis daniñas: aquelas que fan pensar e rir ao mesmo tempo. Recoméndase que se absteñan de lelas as persoas que aborrecen as ambigüidades, as contradicións, os paradoxos, os xogos de palabras. E as persoas que cren ser máis maduras e profundas e convincentes canto máis serias se poñan. Para máis, son todas do mesmo autor, polo que a sobredose pode ser aínda máis prexudicial para a saúde. Máis aínda porque foron escritas hai máis de cen anos e ao metabolismo mental humano, tan propenso a buscar claridade e certezas absolutas, cústalle moito asimilalas. Máis aínda en tempos de polarización, fanatismo e populismos varios.

Non hai nada que fracase tanto como o éxito. / Moitos son bos porque o seu coñecemento do mal é moi escaso. / No momento en que un ama algo, o mundo convértese no inimigo. / O obxectivo do escultor é convencernos de que é escultor, o obxectivo do orador é convencernos de que non é orador. / Agradou a todos os bohemios afirmando que as mulleres son iguais aos homes; pero despois enfureceunos insinuando que os homes son iguais ás mulleres. / Por suposto, a verdade ten que ser necesariamente máis estraña que a ficción, porque a ficción fixémola nós á nosa medida. / Deberíamos ver tan fondo nun hipócrita que chegásemos a ver incluso a súa sinceridade. / A verdade é que non hai nada polo que os homes fagan esforzos máis hercúleos que as cousas que saben que non merecen. / A primeira lei da saúde é que as nosas necesidades non deben ser aceptadas como necesidades: deben ser aceptadas como luxos. / A única forma perigosa e inmoral de beber viño é bebelo como medicina. / É fácil negarse a un mesmo a festa: é moi difícil negarse a un mesmo a normalidade. / Ata o vicio require unha especie de virxindade. /A esperanza comeza a ser útil exactamente no instante en que deixa de ser razoable. /Aledámonos moito de que sexa un home ordinario, pois iso pode axudalo a ser un avogado excepcional. /Na vida real as persoas máis fanáticas son as que non teñen ningunha convicción. / Se un home é verdadeiramente superior aos seus semellantes, na primeira cousa que cre é na igualdade dos homes.

     Non sei se ten moito sentido isto que acabo de facer. Só sei que ás veces necesito escribir un texto rindo e pensando ao mesmo tempo. Axúdame a levar a vida en momentos, como este comezo de curso, académico e político, convulsos.