Francisco Ant. Vidal Blanco. Men-tres a edición de libros en castelán, catalán e vasco aumenta, en galego cae máis dun 13 %, segundo publicou o Mi-nisterio de Educación e Cultura. E falando con amigos escritores, todos me din o mesmo, que teñen o caixón ateigado de orixinais que as editoriais, por lóxica comercial máis ca por interese literario, non se molestan en editar. Á fin o negocio é o negocio e as almiñas da caridade sono mentres se poida asegurar un bo número de vendas. A realidade, segundo me comenta un editor, é que a edición en galego baixou a niveles de hai vinte anos.

O que non sei é se o galego xa se considera en tal perigo de morte que debamos ir pensando en embalsamalo, como, polo que acabo de saber é o que pretende facer coas linguas minoritarias e moribundas a National Poetry Library, quen en colaboración coa BBC vén de facer un chamamento dentro do Día Nacional da Poesía para deixar constancia delas, tras facerse eco dunha estimación da Unesco segundo a cal a metade dos idiomas de hoxe en día non terán falantes para finais do presente século. Así pois comisionaron a varios poetas co encargo de buscar, escribir, recitar e gardar poemas daqueles usos idiomáticos dos que quedan moi poucos falantes, e aínda piden que se lles envíen poemas escritos ou lidos en calquera daqueles ós que poden chegar antes do seu fenecemento definitivo, seguros como están de que a perda dunha lingua é unha perda para toda a humanidade. De feito aseguran que xa se está perdendo unha lingua cada dúas semanas, e con cada unha delas pérdese unha maneira propia de contar, de dicir e de definir o mundo.