Pastor Rodríguez. Nacido en Noia en 1978, membro do colectivo Sacou, responsable da editoria Acha Escrava, da plataforma A Lanzadeira de Alcor, e fotógrafo. En 2008 publicou Antítese narrativa. En 2020 acada os seus maiores éxitos e é cando publica Rompe, Vangarda ule, II Premio de Poesía Eduardo Pondal, e Desde non nace, VIII Premio de Poesía Manuel López Ardeiro. Entre outros premios, foi galardoado co Premio Suso Vaamonde, co Premio Ánxel Casal e co segundo premio no Leiras Pulpeiro. Tamén en 2020 obtivo o XXII Premio de Poesía Concello de Carral coa obra Nas pulsacións, editada por Espiral Maior en 2021. Nese mesmo ano gaña o Premio Avelina Valladares que publica edicións Fervenza co título Para que non me esqueza. Poemas seus figuran en volumes colectivos como 37 poemas por man propia (2005) ou Arquitecturas (2019), ademais de ser editados en revistas como Dorna, Treme a Terra, Casa da Gramática, A Caramuxa ou Século XXI. O seu activismo cultural levouno a organizar o Encontro Nacional de Poetas Galegos, a crear a emisora de radio por internet AnfiteatroGZradio, a participar na asociación Terra de Outes e no dúo poético-musical NON SomoS NÓS. Non debe esquecerse que foi cofundador do Grupo Literario Avilés de Taramancos e da Asociación Teatral Éteatro e colaborador da Asociación Audiovisual Paradiso. Artista multidisciplinar, á poesía e á fotografía une pintura, música e vídeo. Representou a Galicia no World Poetry Day en 2001, que organizou o Pen Clube de Galicia en Compostela.