Inés Otero. Este libro, subtitulado Unha paixón con consecuencias, está escrito por este autor alemán (Düsseldorf, 1958), especialista na obra de Thomas Mann, moi recoñecido por dous best sellers: As mulleres que len son perigosas (2005) e As mulleres que escriben tamén son perigosas (2007), uns libros que se traduciron a vinte idiomas e levan vendidos máis de medio millón de exemplares. Esta obra está dividida en catro partes. Na primeira, titulada COMEZA A FEBRE DA LECTURA, analiza o mundo dos libros no século XVIII, a partir de tres acontecementos: o efecto Werther, a figura de Caroline Schegel-Shelling e a revolución que supuxo para o mundo das letras Mary Wollstonecraft. Na segunda parte, O PODER DA LECTURA, estúdase o século XIX a partir, entre outras, das obras tecidas nesta época por Jane Austen, Flaubert  ou o fato de escritores reunidos nas marxes do Lago Lemán, onde pariron aquel monstro chamado Frankenstein. Na terceira parte, baixo o título de MULLERES E LIBROS, aparece o grupo de Bloomsbury, James Joyce, Marilyn Monroe (a bomba sexual lectora) e Susan Sontang. O libro remata cun capítulo, PRESENTE, onde se analiza as repercusións que tivo no mundo da literatura a transgresora Cincuenta sombras de Grey.

Mulleres e Libros (2015) reúne trescentas anos de literatura. Unha época onde a febre da lectura acadou as mulleres (como atrapou a Madame Bovary –a quen o adulterio non lle impediu deixar de ler– e a Anna Karenina –que libro lería antes de suicidarse?) mentres os homes se burlan sen barruntar o desastre que se lle vén enriba”.