Pilar Sampedro. Factoría K publica Nelson Mandela. O camiño cara á liberdade da autoría de Antonio Lozano e traducido por Ramón Nicolás. Antonio Lozano xa conta con outro texto traducido á nosa lingua, Eu son Suleimán. Unha boa novela que trata dos traballos dun rapaz africano que chega ao noso país despois de mil vicisitudes, pero non para acadar o paraíso senón para volver ao punto de partida ao que o devolven no final do relato. Unha historia triste da que semella ter caído a esperanza. Unha narración que se converteu nunha obra teatral moi representada en Canarias. Agora, volve a África para contar a historia de Mandela a través do relato dun mozo que vén sendo o seu bisneto. Un rapaz que se enfronta ao pai para recuperar a avoa que vive no lugar onde se garda a memoria de Madiba e, ao tempo que recobra a infancia, vai entrando na vida do home máis importante de Sudáfrica. O home que pasou calamidades por centos pero logrou acaban co apartheid, o que sae do cárcere para converterse en presidente do goberno e está na vangarda dunha loita que ten moito de pacifismo e valores éticos.

Diso trata o libro, deses valores de respecto ao outro e á outra e de como o diálogo cos demais nos axuda a comprender o mundo e comprendernos nós. Trata tamén desas ensinanzas que hai que lembrar pois non todos saben do papel dos seguidores de Gandi e os comunistas na loita man a man cos militantes do Congreso Nacional Africano.

A min gústame lembrar aqueles anos nos que o mundo non foi alleo a esta loita, e en Glasgow pasaron a poñerlle o nome de Mandela á rúa onde estaba o consulado de Sudáfrica para que cada carta que chegaba lles lembrase a quen tiñan na cadea contra a opinión de Occidente.

Volveremos ver eses actos de solidariedade algunha vez?

Canta falla están a facer!

Esas son as boas noticias que quixeramos ler nos xornais.