Xerardo AgraFoxo. Entre as descubertas realizadas por Rinoceronte Editora están as obras do exipcio  Alaal Al Aswany (O edificio Yacubian), o senegalés Ousmane Sembéne (O xiro postal) e, ultimamente, a do nixeriano Chinua Achebe, autor de Todo se esfarela e Xa non hai acougo.  Un novelista, fillo duns pais da cultura ibo pero misioneiros protestantes. Achebe estudou Literatura na universidade  de Ibadan e foi profesor no Bard College de Nova York.

En Todo se esfarela (2013) conta, a través das peripecias de  Okonkwo, un líder do pobo de Umofia,  como a civilización europea  asolaga os costumes do mundo africano e as consecuencias desta invasión no continente negro. O choque de culturas, a aborixe e a branca, converten esta historia nun drama, onde a morte do neno Ikemefuna, por culpa das supersticións, son un claro exemplo do talento narrativo deste autor.

En Xa non hai acougo (2013), Obi Okonkwo, un funcionario da administración colonial, logo de conseguir en Gran Bretaña un título universitario e un traballo na administración, vese encerellado nun caso de corrupción. Se na anterior obra o autor cargaba contra o colonialismo, aquí critica con crueza os seus paisanos (Non hai un só nixeriano que sexa quen de renunciar ao mínimo privilexio en interese do seu país. Dende os ministros ata o funcionario máis insignificante. E din que queren gobernarse sós) e  certas crenzas ancestrais do seu pobo ibo, como a que lle impide a Obi casar coa súa moza da etnia osu, que é coma unha lepra para a nosa xente, dille o pai.

Así escribe Chinua Achebe, sen ningunha concesión ao sentimentalismo ou imaxes exóticas.  Así é tamén a tradución de Saleta Fernández, unha excelente oportunidade para mellorar os coñecementos do noso idioma. Esperamos con impaciencia a terceira entrega desta singular triloxía africana.