Román Arén. Algo esvaecida está hoxe a figura literaria do arxentino Arturo Capdevila (1889-1967), do que se seguen a ler as súas evocacións da historia arxentina da Independencia, moi ben escritas, cun equilibrio entre a literatura e a historia que as fai moi amenas (na colección Austral están editadas), pero tamén bo poeta modernista en Jardines solos (1911), Melpómene (1912), El poema del nenúfar (1915), El libro de la noche (1917), La fiesta del mundo (1922), Córdoba en el recuerdo (1923), Córdoba azul (1940), mais tamén ensaísta (Babel y el castellano, 1928), dramaturgo (La Sulamita, 1916), historiador e filólogo. Doutor en leis, membro da Academia Argentina de Letras e da Academia Nacional de Historia, polemizou con Luís Seoane por mor dos galeguismos na lingua dos arxentinos, que Capdevila consideraba “brasileirismos”.

Pero en 1955 publicou un fermoso poemario, Canto gallego, editado en Madrid. Nel está “Rosalía”:

Si Rosalía Castro fué una rosa,/rosa galaica. Rosalía,/dulzor de la mañana; de la tarde/melancolía;/rosa en que era el rocío de la noche/como desconsolada pedrería/y a quien cantaba el ruiseñor/su más celeste melodía…/Si Rosalía fué una rosa,/rosa galaica, Rosalía,/la suma del encanto de la vega/y de la ría…/Si Rosalía fué cáliz abierto/que néctares del cielo recogía;/rosa como de cerco del camino/¡pero de qué jardinería!/Si Rosalía fué rosa entre rosas/de la galaica poesía;/rosa que ya en el nombre que le dieron/a perfumar se abría…,/entonces, por la gala/de esa floral ciudadanía,/todas las rosas que Galicia enciende,/todas las rosas que Galicia cría,/todas las rosas de Galicia, gracia,/y corona, y diadema, y lozanía…,/todas las rosas de Galicia sean,/todas las rosas para Rosalía.