Pastor Rodríguez. Non coñecemos a data nin o lugar de nacemento do sacerdote José Rodríguez del Casal, pero si que foi párroco de Santa María de Lampón (Escarabote, Boiro) e que en 1811 publicou un folleto, impreso en Santiago de Compostela por Manuel Antonio Rey, que leva por título Sermón que para alentar el patriotismo e imprimir valor a nuestras tropas y alarmas dijo en la Iglesia Parroquial del Deán, D. José Rodríguez del Casal, con motivo de la bendición de la bandera de la alarma de aquel partido. O motivo de tropas e alarmas non era outro que A Francesada (1808-1814) ou Guerra da Independencia. Pero se ignoramos o lugar e data do seu nacemento, si sabemos o lugar e data da súa morte, mercé ás investigacións de Xosé Ramón Barreiro Fernández, publicadas na obra Parlamentarios de Galicia. Biografías de deputados e senadores (1810-2001), editada en 2001. Rodríguez del Casal foi elixido deputado suplente a Cortes en 1820, seguramente como liberal. Morto o deputado titular, Ruíz Prado, toma posesión no Congreso o 2 de marzo de 1821 e na sesión do 13 de outubro dese ano defendeu unha iniciativa parlamentaria que propuña un modelo de división para Galicia en cinco provincias: A Coruña, Santiago, Tui, Lugo e Ourense. Pero a morte non lle deixou seguir o seu labor de deputado, e o 26 de outubro de 1821 falecía en Madrid.