Inés Otero. Cun enigmático título, esta narradora escribiu unha das xoias máis prezadas da novela curta americana. Willa Cather, que nacera en Winchester (Virxinia) no ano 1876, pertencía a unha familia de orixe irlandés e pasou a súa infancia no estado de Nebraska, un territorio colonizado por inmigrantes checos e escandinavos, e que ela percorreu  no seu día vestida de home e baixo o reivindicativo nome de William. Entre as obras que a converteron nunha escritora importante, antes da súa morte na cidade de Nova York en 1947, están Mi Antonia (1918), Una dama extraviada (1923) –publicadas por Alba Clásica– , La muerte y el arzobispo (1927) e One of Ours, que recibiu o Premio Pulitzer no ano 1922.

En Mi enemigo mortal (1926) conta a vida de Myra Driscoll, unha muller do sur de Illinois que se converteu nunha lenda –entre os seus veciños– cando renunciou á fortuna familiar para casar co home que amaba, Oswald Henshawe. A historia está narrada por unha moza que presenciou certos feitos de forma episódica, pero que acaba comprometéndose emocional e imaxinariamente con eles. A obra está dividida en dúas partes cunha simetría semellante, pero cun punto de vista diferente. Na primeira conta a fascinación que lle produciu a aventura amorosa de Mary Driscoll e a súa vida displicente en Nova York. Na segunda, transcorridos dez anos, a acción trasládase á costa Oeste, e a narradora deixa de ser unha observadora apaixonada para tomar parte na historia da protagonista que agora vive cinguida por outras circunstancias máis amargas.

Un libro imprescindible pola súa profundidade narrativa, e un título misterioso que nos axuda a comprender esta conmovedora historia que, como dixo o crítico e  escritor José María Guelbenzu, “é tan fonda a súa beleza literaria que ata se lle perdoa a brevidade”.