Elisa Lobeira. Ese é o título, posto na nosa lingua, dunha novela curta de Annemarie Schwarzenbach (1908-1942), escritora suíza de lingua alemá. A tradución é de Mª Esperanza Romero e a edición de Alexis Schwarzenbach. A editorial, Minúscula, onde tamén están en catálogo Muerte en Persia e Todos los caminos están abiertos. 

Nacida en familia de grandes empresarios suízos, íntima de Klaus e Erika Mann, residiu en Berlín de 1931 a 1933, onde se opuxo ao nazismo. Doutora en historia e arqueóloga, gran viaxeira por Asia, África, América e Europa, morfinómana, con tendencias suicidas, morreu nun accidente de bicicleta en Sils. Este é o único libro da autora que ten por escenario Suíza, e non se publicou ata 2008. Historia da fascinación dunha muller por outra. Foi escrita en 1929, e apareceu no Arquivo Suízo de Literatura quizais por doazón da herdeira da autora, Anita Forrer (1901-1996). Antes desta nouvelle só publicara un conto, pero o relato amosa unha gran madurez, unha mirada lúcida de gran sensibilidade na descrición do desexo. Narradora con bastante obra, fora moi criticada por non tematizar suficientemente a súa homosexualidade, pero agora habería que rexeitar eses xuízos. A literatura lésbica estaba a comezar con Orlando da Woolf e O pozo da soidade de R. Hall. A suíza non metaforiza como Virxinia, senón que está na realidade, o que a aproxima a Hall, pero a suíza cre que é posible unha solución, unha liberdade, para as lesbianas.