Miguel Mariño. Nas orixes mellores do policial en lingua alemá está Glauser (1896-1938), nacido en Viena e suízo de nacionalidade. Un escritor audaz para o seu tempo, próximo a Simenon pola magnífica captación de ambientes, menos etéreo ca este pero máis contundente. Novelas como Schlumpf, Erwin: Homicidio ou O reino de Matto amosan ben o seu estilo. Crea un policía, Studer, máis perto de Maigret ca de Holmes. Humor , ás veces negro, un raro lirismo irónico, pouco “suspense” e boas descricións. A Suíza ordenada e os seus problemas. Un autor importante no xénero que se negaba a considerarse importante, pois tíñase por un “narrador policial sen máis”. O cine sacoulle bastante bo partido. As súas hisotiras son audaces sen escándalo, as historias dun observador da vida humana, co que nin sequera é obrigatorio empatizar. O mellor antecedente dos grandes narradores suízos de lingua alemá (Dürrenmatt e as súas novelas O xuíz e o seu verdugo ou A sospeita, por exemplo).