Román Arén. Carmen Conde (Cartaxena, 1907-Madrid, 1996) foi a primeira muller académica numeraria da RAE en 1979 e, no seu discurso de ingreso, Poesía ante el tiempo y la inmortalidad, glosou varios versos de Rosalía. Pero xa en 1976 tiña escrito un extenso poema, “Rosalía de Castro (Collage)”, no que mestura os seus versos cos da poeta de Follas novas. Publicouno no volume El tiempo es un río lentísimo de fuego, de 1978, pero non foi o único poema rosaliano da autora, pois en 1980 incluíu outro no que Rosalía (“tan leve cual el ave que deja/el rastro de una luz al emprender su vuelo”) vai unida a Gertrudis Gómez de Avellaneda e a Carolina Coronado. Publica de novo os textos Alonso Montero en Vintesete escritores de fóra falan de Rosalía de Castro (1997) e eu selecciono só as dúas primeiras estrofas de “Rosalía de Castro”, nas que Carmen Conde alude á súa orixe galega pola liñaxe materna (Celso Emilio, amigo seu, afirma que seu avó materno era galego):

Vamos a caminar entre los árboles/de nuestra Galicia, que también la lleva/la mitad de mi sangre…/Busco tu brazo para apoyarme en él/que nada importa/que en el nacer nos separen setenta años./Puedo repetir con versos tuyos/que “el camino antiguo nos saldrá al paso”./”¡Oh tierra, antes y ahora –decimos juntas-,/siempre fecunda y bella!”./Y ya no importan “en su sepulcro el muerto;/el triste en el olvido y mi alma/en su desierto”./Eres una madre de mi espíritu, llegaste/cuando íbame subiendo la marea/que a firme vocación alcanzaría./Andábamos a solas entre gentes/mas, “¿qué es la soledad? Para llenar el mundo/basta a veces un solo pensamiento”.

A mesma Carmen conde cita a edición que García Martí fixo da obra rosaliana para a editorial Aguilar. A autora, amiga de Juan Ramón, Miguel Hernández e concha Méndez, comezou a súa andaina poética en 1929 con Brocal, que continuou en 1934 con Júbilos, pero a maioría da súa obra, que inclúe narrativa, memorias e obras para nenos, editouse na posguerra. Colaborou en <Alfar> d’A Coruña, foi fiel á República e logrou adaptarse no franquismo. Estivo casada dende 1931 con Antonio Oliver Belmás (1903-1968), un dos bos poetas menores do 27, autor de Mástil (1925), Tiempo cenital (1932) e Elegía a Gabriel Miró (1935). Preso tras a guerra civil, as súas Obras completas editáronse en 1971. Dedicou un breve ensaio a Rosalía en 1963, moi positivo sobre a poética rosaliana (“metáforas, oraciones, polimetría, todo se junta a un fin que no es otro sino el de herirnos en el alma, que es donde duele, por auténtica, la poesía”).

Celso Emilio Ferreiro dedicou un fermoso poema a Carmen Conde.