Román Arén. En 1865 nacía en París o poeta Robert de Souza, un simbolista canónico que rematou por escribir libros sobre a cidade na que residía durante varios anos, Niza. Pero destacou na poesía con libros como Modulacións sobre o mar e a noite, de 1899, ou Himno ao mar, de 1908. Foi, ademais, paisaxista, preocupado por preservar os monumentos e paisaxes de Francia. Outros dos seus libros destacados foron Sources vers le fleuve (1897), Fumarelles (1894) e Les graines d’un jour (1901).

Pouco frecuente é a súa presenza nas antoloxías, xa que nin figura en La poesía moderna francesa (1913) de E. Díez-Canedo e Fernando Fortún, nin tampouco en Las cien mejores poesías líricas de la lengua francesa (1919) ou en Poesía simbolista francesa (1975), de Manuel Álvarez Ortega. Nas antoloxías españolas si que figura na de Luis Antonio de Villena, editado por Gredos en 2005, aínda que só con dous extractos do libro de 1899 (“Bajo el pavés del cielo y del poniente/la ciudad pequeña oscila como el puerto…”).

Si figura nas antoloxías francesas que inclúen os simbolistas, pero é tamén rara a súa poesía en antoloxías máis convencionais e así está ausente de Les cent meilleures poemas (lyriques de la langue française (1911) de Auguste Dorchain.

Non me consta que se traducise ao galego e non figura en Poesía inglesa e francesa vertida ao galego (1946 e 2005) por Plácido Castro, Lois Tobío e Florencio Delgado Gurriarán, escolma na que si están presentes Rimbaud, Verlaine, Baudelaire, Mallarmé, Maeterlinck, Régnier e Klingsor.

O ano de nacemento de Robert de Souza, 1865, é moi significativo, pois é a data de nacemento doutros simbolistas importantes como André Fontainas ou A.-F. Hérold. Todos foron membros dunha xeración importante nas letras francesas, a de Schwob, Claudel, Jammes e Gide. Souza falecerá na súa cidade natal en 1946.