Román Arén. Nas lembranzas que mereceu o 150 aniversario da saída do prelo, en Vigo, do libro fundador da literatura galega contemporánea, Cantares gallegos, amálgama perfecta de cultura popular e alta cultura literaria, hai que destacar o número de xullo do 2013 de Casa da gramática, a revista noiesa que é xa, un dos fitos culturais da bisbarra. Inclúe sempre o especial Papel de color, recordo da xuvenil iniciativa do Cunqueiro de preguerra, con colaboracións non só do alumnado do Instituto de Ensino Secundario Virxe do Mar, senón de escritor@s de noso e de toda Galicia.
Neste especial, tras o balbordo da aparición de varios inéditos rosalianos, inclúese o traballo do profesor Ramón Torrado Romero, o primeiro en dar noticia do inédito galego da autora padronesa. Traballo cheo de amor á Rosalía, con opinións persoais dignas de tomarse en conta e que fixeron que a Real Academia Galega felicitase o autor.
Pero, ademais deste ensaio, en Negra ausencia de contento, A. Requeixo estuda a presenza de Rosalía en Díaz Jácome, Ramón Blanco fai uns Apuntamentos sobre o galego escrito por Rosalía de Castro, Ana María Blanco escribe sobre Algunha lectura de Cantares, e M. do Río Rodríguez dános a coñecer A Rosalía do Báltico, a poeta estoniana Lydia Koidula, da que nos ofrece na nosa lingua algúns textos.
Parabéns aos promotores deste número de Casa da gramática, digno homenaxe a Rosalía.
Aínda que un chisco académico, Román sempre nos deixas textos feitos cunha elegancia e unha testura tan delicada, que son unha lección para eu aprender. Parabéns tamén para ti. Bos días.