Román Arén. Os que vivimos no franquismo temos lido e oído os panexiristas de Franco cualificalo de “centinela de Occidente”, “Caudillo”, “espada que venció al comunismo” e ata que era gran cazador e pescador, pero o do sorriso de Francisco Franco logra aínda deixarnos abraiados. Pero non debía ser así entre 1936 e 1945, xa que os seus poetas turiferarios tiñan moi presente este sorriso. Revisando a Historia social de la literatura española, de Blanco Aguinaga, Rodríguez Puértolas e Luis Zavala, que Torrente Ballester chamaba “historia estalinista da literatura” porque non lle gustaba o que se dicía del, atopo uns versos de Manuel de Góngora y Ayustante (1889-1953):

“Y frente al agrio gesto de tu hoz y tu martillo,/la generosa y franca sonrisa del Caudillo”.

Os versos proceden do poemario Dolor y resplandor de España (1940). Manuel de Góngora tivo certo éxito como dramaturgo, autor de zarzuelas e comedias como La razón del silencio (1933) ou La mujer de aquella noche (1932), mentres que como poeta foi un romántico serodio (Polvo de siglos, 1912). Pero o do sorriso de Franco non foi unha invención del, pois estaba xa en Manuel Machado:

“¡La sonrisa de Franco resplandece!”

E tamén en Eduardo Marquina:

Los días heroicos/de los heroísmos singulares pasan/y en esa otra ya histórica sonrisa/franca,/en la sonrisa del Caudillo clara,/en aquel humanismo de la viril sonrisa/con que ecuánime Franco de luz a las batallas…”.

Nisto do sorriso de Franco non pode un deixar de lembrar a copla que Emilio Romero aplicaba a Leopoldo Calvo Sotelo:

En tres cosas te pareces/a la estatua de Colón:/en tu cara, en tus gestos/y en tu conversación.