Versos para aquecer o espírito

BJ27C4F2_202454Paz Fernández Vázquez. Mirábao como só saben mirar as nais, e abrazábao como para estar segura de que aquel neniño estaba feito de carne e non dos seus soños. Faláballe baixiño coma se lle contase un gran segredo e el, con aqueles ollos de asombro que se pousaban inquedos ante cada descuberta, parecía entendela.

-Sara, volvo en cinco minutos. Compro o pan e encargo unha empanada para mañá -díxolle a súa amiga Lucía.

-Volve cando queiras -respondeulle Sara, sen apenas escoitala.

Seguiu acariñando a pel de veludo do neno e bicando de cando en vez as súas fazulas mentres lle falaba. «Es lindo como un zarrotiño de outono! E sabes? Cando sexas grande, has falar galego e serás poeta». Entón, comezou a recitarlle versos de Rosalía. Fóra erguérase algo de vento e chovía unha música que acompañaba as palabras de Sara até que se escoitou un golpe seco. Era a porta que o aire pechara con forza ao paso de Lucía, que volvía co pan.

-Xa estou aquí! Dáme o neno, Sara. Teño que ir facer o xantar. Fóra comeza a facer frío e non quero que enferme. Moitas grazas, querida.

-Tráemo cando queiras, xa sabes.

Cando Lucía pechou a porta da entrada, Sara sentiu que a chuvia golpeaba o seu ventre baleiro. Pasaba dos cincuenta e nunca, nunca sería nai. Prendeu a calefacción, achegouse a un andel onde escolleu un libro, e seguiu memorizando versos para aquecer o seu espírito.

2 comentarios en “Versos para aquecer o espírito

  1. Grazas, Magdalena. Os fillos dannos moitísimo e, á súa vez, nós dámoslle todo o mellor do que somos capaces: a vida e a ilusión enteira. Logo, deixámolos voar,e seguen levando aquilo do que nos desposuimos. Apertas!

  2. Moitas grazas, Paz, por esta entrada tan boa. Tratar de explicar o que significa ser nai e un sentimento de moi difícil calificación, e debe ser tamén moi duro querer selo e non poder.
    Non recordó quen era o que dicía que os nenos son a alegría da casa, pero logo añadía… hasta que chegan da escola.
    Bueno, con esta pequeña broma dígoche: hasta a próxima, desde Palmeira.

Deixa unha resposta

O teu enderezo electrónico non se publicará Os campos obrigatorios están marcados con *

Podes utilizar estas etiquetas e atributos HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>