O periplo de Ibrahim

Ilustración: Belén Rodríguez Pazo
Ilustración: Belén Rodríguez Pazo

María Xesús Blanco. —Ti quéresme?

—Pois claro

—Entón, por que te vas?

—Sabes que non pode ser doutro xeito.

Escóitanse voces dun home e dunha muller saíndo do aparello. Ibrahim non mira a pantalla. Nin tan sequera semella escoitar. Olla por un instante o floreiro con rosas que alguén puxo na repisa da xanela. A dor no bazo é intensa pero comeza a sentir a suor que zumega a súa pel ao baixar o fluxo do calmante. Varios meses nesta acolledora cidade e as secuelas do naufraxio aínda saen a flote de cando en vez. Xírase tentando buscar unha posición máis cómoda. Á súa beira, o enfermeiro regula a velocidade do soro e toma anotacións. Despois colga o portapapeis ao pé da cama e sae empurrando un carriño. Leva unha bandexa na que hai un termómetro e un bote con inxectábeis. Antes de saír para e da instrucións ao familiar que está co paciente do lado nun ton de voz baixo. Ibrahim sente agora que a dor comeza a acalmar. De fondo soan, adurmiñadas, as notas dunha peza musical ao compás dunha conversa. Vólvelle ao pensamento aquel paseo con Amira na praia de Iftane. Na súa mente a imaxe dos seus ollos melosos e tristes mergullados nos seus. Despois a despedida. E o desacougo tan grande no peito daquela noite á deriva. A sensación de claustrofobia naquela balsa minúscula, apertados uns contra os outros sen un oco para estarricarse. E coa auga da chuvia aterecendo o corpo todo. A negrura densa dunha viaxe nun mar empoleirado que case o leva deste mundo. Non quere lembrar máis. Só durmir. Esquecer. Pecha os ollos. Neste intre si que comeza a sentir, de verdade, o sopor do calmante. E as palabras que oe, coma un eco que volve unha e outra vez, lémbranlle outras que foran ditas había moito tempo. Fanlle dano. De súpeto, na habitación, espállase o silencio. O tempo do televisor rematou. E o sono adurmiña, agora, a dor e os recordos.

Deixa unha resposta

O teu enderezo electrónico non se publicará Os campos obrigatorios están marcados con *