Xerardo AgraFoxo. Se estás baixo de moral ou afectado pola pantasma da pandemia, por favor, non leas este libro. Malia que semella unha biografía sobre o autor de Vida e destino, en realidade, narra a historia dun país que un día tomou unha decisión transcendente: SUPRIMIR A VERDADE. Entón desapareceron do seu mapa varios millóns de xudeus e milleiros de opositores. Unha sorte de Holocausto porque, se abrías a boca, tanto que foses un neno, un vello ou un soldado raso, dabas cos ósos nunha gabia. Así sucedeu durante varias décadas de silencio, tortura e represión. Esta teima suicida intentou silenciar a Vasili Grossman, que morreu sen ver publicada a súa magna obra: Vida e destino. Unha morte amarga que non sufriu o seu amigo Pasternak que morreu tres anos despois de aparecer no estranxeiro Doutor Zhivago. Nesta obra de Alexandra Popoff cóntanse moitas historias arrepiantes. Entre elas destaca a dun científico que, despois de penar varios anos no inferno siberiano, viu como a policía lle rexistraba acotío a súa casa. Querían confiscarlle a máquina de escribir. Para que a querían aqueles que SUPRIMIRON A VERDADE? Sabían que era o seu único medio para CONTAR A SÚA VERDADE. Os dedos das mans deixáraos no GULAG.
Se estás baixo de moral… non leas este libro. Se cres que hai ditaduras boas e malas… tampouco.
Fareiche caso, Xerado, haberá tempo para facelo. Considero que agora é mellor ler algo que nos entreteña con máis amenidade. Non obstante, apunto o título para cando o tempo nos dea unha tregua de positividade.
Unha aperta, Xerardo.