Román Arén. Non coñecín a poesía de Rodolfo Serrano, mais polo seu último libro, El frío de los días (2021), descubro que este é o seu décimo poemario e que músicos como Javier Nervio, Ismael Serrano ou Andrés Molina puxeron música a algúns dos seus poemas. O autor naceu en 1947 en Villamanta (Madrid) e foi xornalista, premiado polas súas crónicas parlamentarias editadas en <El País> e, ademais, gañou o Premio Mesonero Romanos pola súa colección de artigos “Historias de Madrid”. Fóra diso, publicou ensaios, novelas e libros de historia. No volume El frío de los días, subtitulado “Viejos tangos encontrados en una maleta”, atopo o poema “Noche en la aldea”, adicado a Valle-Inclán, ou, mellor, a Bradomín. Valle, despois de Rosalía, e xunto con Curros e Castelao, é un dos escritores galegos máis cantados en verso, mesmo por nomes tan importantes como Antonio Machado, Rubén Darío ou Gerardo Diego, sen esquecer algún que outro poema en galego, por exemplo o de “Abel de Acebedo” en <A Nosa Terra> por mor da súa morte en 1936. di así o poema de Serrano:

Hace una noche espléndida. Relucen/muy lejanas las luces de los pueblos,/igual que estrellas rojas. Por el campo/se escuchan esquilones y ladridos./Un cárabo, en la higuera que hay enfrente,/repite una advertencia milenaria./Está ya todo en paz. En la farola/se estrellan los insectos. Por la calle/pasa un niño corriendo. Se despierta/este recuerdo dulce de otro tiempo,/cuando el mundo era joven y tenía/la exacta proporción que habita el hombre./Me entrego a la quietud que me rodea./En la terraza leo/-no sé ya cuántas veces-/a Don Ramón. El Marqués, feo,/católico y sentimental,/me habla de Concha./Y de su amor maldito y desgraciado./Escucho sus palabras, y me cuenta/de esas pasiones fieras y adoradas,/las que todas soñamos./Le escucho mientras canta/el placer del pecado y rememora/los jardines umbríos del palacio./El universo de meigas y conjuras,/las iglesias oscuras y los cuentos/de los muertos y de almas/recorriendo los montes y caminos./Y, sobre todo,/amigo Bradomín, qué razón tiene:/lo que importa no es ser primer amor./Es ser el último.

O libro de Serrano leva un prólogo de José Mª Sanz (Loquillo), quen, con razón, pon o acento na nostalxia do non vivido e o orgullo polo perdido.